Хонконгийн эдийн засаг 2020 онд 6.1 хувиар агшиж, Азийн санхүүгийн хямралаас хойш буюу 1998 оноос хойших хамгийн тааруу гүйцэтгэлийг үзүүллээ. Гэхдээ 13 сарын өмнө Хонконгийн хамгийн чинээлэг 50 эрхэм жагсаалтыг “Forbes” сэтгүүл гаргаснаас хойших хугацаанд “Hang Seng” жишиг индекс 5 хувиар өссөнөөр энэхүү жагсаалтын 50 гишүүний нийт хөрөнгө 7.5 хувиар нэмэгдэж, $331 тэрбумд хүрсэн байна.
Бизнесийн магнат Ли Ка-шингийн хөрөнгө “Zoom”-д хийсэн хөрөнгө оруулалтынх нь хүчээр 20 хувиар өсөж, $35.4 тэрбумд хүрснээр Хонконгийн хамгийн чинээлэг иргэнээр дахин нэрлэгдэж эхэллээ. Түүний үл хөдлөх хөрөнгө хөгжүүлэгч “CK Asset Holdings”-ийн хувьцааны ханш 27 хувиар буурсан ч АНУ-д бүртгэлтэй “Zoom”-д эзэмшдэг хувьцааныхаа ачаар хөрөнгөө өсгөжээ. Өнгөрсөн жил Лиг бага зөрүүгээр ардаа орхисон, үл хөдлөх хөрөнгийн магнат Ли Шау Ки 30.5 тэрбум ам.долларын хөрөнгөтэйгөөр энэ жил хоёрдугаар байранд ухран оров.
Ам.доллараар хамгийн ашигтай ажилласан эхнэр, нөхөр Юн Кин-ман, Лам Вай-иен нар хөрөнгөө хоёр дахин өсгөж, 18.6 тэрбум ам.долларт хүргэснээр зургаан байр урагшилж, дөрөвдүгээрт оржээ.
RELATED STORIES
Харин хувь хэмжээгээр тооцвол тавилга үйлдвэрлэгч “Man Wah Holdings”-ийн Вонг Ман Ли хамгийн өндөр өсөлт үзүүллээ. Хятадын эрэлт “Man Wah”-ийн жилийн орлогыг 2020 оны есдүгээр сар хүртэлх нэг жилийн хугацаанд 19 хувиар нэмэгдүүлж, 857 сая ам.долларт хүргэсэн бол Вонг Ман Лигийн хөрөнгийг 200 хувиар өсгөж 6.3 тэрбум ам.долларт хүргэжээ.
Хөрөнгө нь 81 хувиар өсөж, 6.7 тэрбум ам.долларт хүрсэн Хорст Жулиусын “Techtronic Industries”-ийн цахилгаан хэрэгсэл, шал арчилгааны бүтээгдэхүүний борлуулалт огцом нэмэгдсэнээр хувьцааных нь ханш өсчээ.
Цар тахалд хамгийн их нэрвэгдсэн үл хөдлөх хөрөнгийн салбарт Хонконгийн тэрбумтнуудын ихэнх хөрөнгө төвлөрдөг учраас хамгийн чинээлэг 50 эрхмийн талаас илүү хувийнх нь хөрөнгө буурсан үзүүлэлттэй байна. Харин өнгөрсөн зургадугаар сард “Wheelock & Co” компанийг хувьдаа авсан Питер Вү энэ давалгаанд өртсөнгүй. 57 жилийн турш хувьцаагаа нээлттэй арилжиж байсан “Wheelock” хувийн компани болсны дараа үнэлгээ нь 52 хувиар өссөн ба улмаар Вугийн хөрөнгө 47 хувиар нэмэгдэн 17 тэрбум ам.долларт хүрчээ.
Худалдаа үйлчилгээний зориулалттай үл хөдлөх хөрөнгө, түрээсийн үнэ буурч байгаатай холбогдуулан ихэнх үл хөдлөх хөрөнгийн магнатуудын хөрөнгө буурсан байна. Үүнд, “Nan Fung Group”-ийн Вивиен Чен, “Chinese Estate Holdings”-ийн Жозеф Лау, “Shui On Land”-ийн Винсент Ло, “Goldin Properties”-ийн Пан Сутонг, “Stan Group”-ийн Тан Шинг-бор нар багтжээ. Ихэнх хөрөнгөө худалдааны төв, үл хөдлөх хөрөнгөөр бүрдүүлдэг Томас Лау ахынхаа хамт жагсаалтаас хасагдлаа.
2021 оны эрэмбэд зөвхөн нэг эрхэм эргэн иржээ. Тодруулбал, “Gaw Capital Partners”–ийн үүсгэн байгуулагч Гүдвин Гау компанийнхаа өмчлөлийн бүтцэд өөрчлөлт хийснээр хөрөнгө нь 1.6 тэрбум ам.долларт хүрч, 44 дүгээр байранд бичигдлээ. Өнгөрсөн жилийн босго 1.2 тэрбум ам.доллар байсан бол энэ жил нэг тэрбум ам.доллар болж буурчээ.
Нийтлэлийг бэлтгэсэн: Шу-Чин Жан Чэнь, Мухаммэд Коэн, Расселл Фланнери, Жейн Хо, Сюзанн Нам, Роберт Олсен, Анурадха Рагунатан, Жессика Тан, Женнифер Уэллс.
