Тэрбумтан Илон Маск АНУ-ын Техас мужийн Остин хотын ойролцоо байршилтай “Giga Texas” автомашины үйлдвэрийнхээ албан ёсны нээлтийг хийлээ. АНУ-д хэмжээгээрээ хамгийн томд тооцогдох үйлдвэр хэмээн түүний тодорхойлсон “Giga Texas” нь 2023 оноос эхлэн нэг жилд хамгийн багадаа 500 мянган машин үйлдвэрлэх хүчин чадалтай болох аж.
Пүрэв гарагт зохион байгуулагдсан “Cyber Rodeo” нээлтийн арга хэмжээнд 1,000 гаруй зочин уригдан иржээ. Шинэ үйлдвэрийн барилга нь уртаараа 1.2 км, өргөнөөрөө 350 метр хүрч байгаа аж.
Германд “Giga Berlin” үйлдвэр ашиглалтад орсноос хэдхэн хоногийн дараа энэхүү үйлдвэр нээгдсэнээр “Tesla” компани ийнхүү нэг сарын дотор хоёр ч үйлдвэртэй болж чаджээ.
Байгуулагдаад хорин жил ч болоогүй “Tesla”-ийн хувьд тус хоёр үйлдвэрийг барьсан нь томоохон амжилт бөгөөд ирээдүйд цахилгаан авто машин үйлдвэрлэлээр тэргүүлэгч компанийн байр сууриа хадгалж үлдэхэд тус болох юм.
Гэхдээ компьютерийн чипний хомсдол болон зай хураагуур хийхэд шаардлагатай түүхий эд материалын төлөөх өрсөлдөөн улам ихэссэнтэй холбогдон тус компанийн өсөлтийн хурд саарч болзошгүй аж.
