Алдарт хөрөнгө оруулагч, тэрбумтан Уоррен Баффетийн “Berkshire Hathaway” компани өнгөрөгч пүрэв гарагт компьютер, принтер үйлдвэрлэлийн “HP” компанийн 11.4 хувь буюу 4.4 тэрбум ам.долларын үнэ хүрэх 121 сая хувьцааг эзэмших болжээ.
Уг худалдан авалт ил болсны дараа “HP” компанийн нэгж хувьцааны үнэ пүрэв гарагийн арилжаагаар хамгийн ихдээ 18 хувиар өссөн нь 2015 оноос хойших хамгийн өндөр үзүүлэлт болжээ.
Калифорнийн Пало-Алтод төвтэй тус компанийн зах зээлийн үнэлгээ одоогоор 43.37 тэрбум ам.доллар байна.
Сүүлийн үед бизнесийн загвар сайтай, өсөн дэвжих бололцоо өндөртэй компаниудад томоохон хөрөнгө оруулалт хийж буй Уоррен Баффет өнгөрөгч гуравдугаар сард “Occidental Petroleum Corp.”-ийн 29.8 сая хувьцааг эзэмших болсны зэрэгцээ хөрөнгө оруулалтын “Alleghany Corp.” компанийг 11.6 тэрбум ам.доллараар худалдан авсан билээ. Харин хамгийн сүүлд “HP”-д хөрөнгө оруулснаар тэрбээр тус компанийн хамгийн том хувьцаа эзэмшигч болж байна.
Эх сурвалж: Forbes
