Хөрөнгийн зах зээлийн идэвхтэй хөрөнгө оруулагч Пол Сингерийн алдар суу зөвхөн Америкаар хязгаарлагдахгүй дэлхийн өнцөг булан бүрд дуулдаж буй. Өнгөрсөн 44 жилийн хугацаанд ердөө 2 жил л алдагдал хүлээсэн Пол Сингерийн хөрөнгө оруулалтын арга барил домог болж үлдэхээр байна.
Пол Сингерийн “Elliott Management” хеж сан өнгөрсөн 44 жилийн хугацаанд жилийн 13 хувийн дундаж өгөөжийг хүртээсэн. Энэ нь “S&P 500” индексийн бенчмаркаас давсан үзүүлэлт юм. Цар тахлын улмаас 2020 онд хөрөнгийн зах зээл уналтад орсон хэдий ч “Elliott” тухайн жилийн сар бүр ашигтай ажиллав. Одоогоор тус сангийн хөрөнгийн хэмжээ 48 тэрбум ам.доллараар хэмжигдэж буй. Тэрчлэн “Forbes”-ийн 2020 оны Америкийн хамгийн чинээлэг 400 эрхэм жагсаалтад Пол Сингер 222-т оржээ.
Пол Сингер Нью-Йоркийн Бронкс дүүрэгт ажилчин ангийн гэр бүлд өсөж торнисон. Багаасаа л хичээнгүйлэн зүтгэсэн тэрбээр Рочестерын их сургуульд сэтгэл судлал, Харвардын их сургуульд хуулийн чиглэлээр суралцжээ. Улмаар ажлын гараагаа 1974 онд “Donaldson” хөрөнгө оруулалтын банканд эрх зүйчээр эхлэв. Үүнээс гурван жилийн дараа гэр бүл, найз нөхдийн тусламжаар 1.3 сая ам.долларыг босгож “Elliott AssociatesL.P.” хөрөнгө оруулалтын компанийг үүсгэн байгуулсан аж. Өдгөө хөрөнгийн зах зээлд “Elliott Management”-ээрээ танигдсан. Эхэндээ эцгийн хамтаар арилжаа хийж, дийлэнхдээ алдагдал хүлээдэг байв. Тиймээс ч тэр хөрөнгө оруулалтын эрсдэлээс зайлсхийх арга барилыг эзэмшсэн учиртай. Түүнчлэн үүнийгээ “Elliott Management” үүсгэн байгуулагдсанаас хойших хугацааны хоёрхон жилд л алдагдал хүлээж чадсан нууцтай холбож тайлбарладаг. Өдгөө тэрбээр Америкийн тэрбумтан хеж сангийн менежерээр танигдаж, хөрөнгийн зах зээл тэр аяараа түүний стратегиас суралцаж байна.
Сингер бусад трейдерийн адилаар хувьцаа худалдан авч, ханшийг нь хэзээ нэгэн цагт өсөхийг найдаж, хүлээж суудаггүй. Хөндлөнгийн ажиглагч байхыг хүсдэггүй нэгэн. 1980-аад оны дунд үед төлбөрийн чадваргүй болсон бонд худалдан авах хандлага давамгайлж байв. Тиймээс, “Elliot” өр төлбөрөө барагдуулах чадамжгүй компаниудын өрийн бичгийг худалдан авч эхэлснээр хөрөнгө оруулалтын шинэ арга барил эзэмшсэн түүхтэй. Тус стратегийн хүрээнд ашигтай байхын тулд трейдерээс тэвчээр, их хэмжээний хөрөнгө шаарддаг. Сингер үйл ажиллагаа султай компаниудад хөрөнгө оруулж, нөлөө бүхий хувьцаа эзэмшигч болох замаар компанийн менежментийг сайжруулж хувьцааны ханшийг өсгөхийг зорьдог. Түүний портфолиод “Trans World Airlines”, “The Euro Tunnel”, “Lehman Brothers”, “Caesars Entertainment” гэх мэт томоохон хэмжээний компаниуд ороод амжжээ.
Хеж сангийн ахмад дайчин Сингерийн баримтлах дараагийн стратеги бол Засгийн газрын бондод хөрөнгө оруулах. Үүнд том эдийн засагтай Америк зэрэг улсын бонд бус, харин өрөнд нэрвэгдсэн орнуудын бонд хамаарагдах аж. Тус арга барилыг Сингер 1995 онд трейдер Жэй Ньюманаас суралцсан гэдэг. Ньюман өрийн хямралд орсон орнуудын Засгийн газрын бондыг маш бага дүнгээр худалдан авч, зээлийн үндсэн дүн болон хүүгийн төлбөр барагдуулах хугацаа болоход шүүхэд Засгийн газрын эсрэг гомдол гаргах санааг Сингерт өгчээ.
Перу 1984, 1996 онд удаа дараалан өрийн хямралд өртөж, Засгийн газрын өрөө дахин санхүүжүүлэх эсвэл дахин бүтэцлэх шаардлагатай байв. Үүнийг Сингер хөрөнгө оруулалтын боломж гэж харж, Перугийн төлбөрийн чадваргүй болсон бондыг хямдруулсан дүнгээр буюу 11 сая ам.доллараар худалдан авчээ. Улмаар 1998 онд Сингер Перугийн Засгийн газрын эсрэг зээлийн үндсэн дүн болон хүүгийн төлбөрийг барагдуулахыг шаардаж шүүхэд хандсан. Эцэст нь шүүхийн шийдвэрээр Перу түүнд 60 сая ам.долларыг барагдуулж Сингер ялалт байгуулсан түүхтэй. Ийнхүү тэрбээр өөрийн стратегид бат итгэж, өрийн дарамтад орсон Аргентины 600 сая ам.долларын нэрлэсэн дүнтэй Засгийн газрын бондыг 100 сая ам.доллараар авах хэлэлцээр хийжээ. Үүнд хеж сангийн тэрбумтан ядуу буурай улс орнуудыг мөлжиж, өөртөө ашиг хийж байна хэмээн ажиглагчид шүүмжлэлтэй хандаж байв. Сингер шүүхийн маргаанаар 14 жил тэмцсэний эцэст Аргентин “Elliott” санд 2.4 тэрбум ам.доллар төлөх шийдвэр гарч байв. Энэ нь түүнд анхны хөрөнгө оруулалтаасаа 1,270 хувийн өгөөж хүртээж, хөрөнгийн зах зээлд томоохон дуулиан дэгдээсэн юм. Санхүүгийн зах зээл Сингерийг хеж сангийн тэрбумтан гэдгээс гадна идэвхтэй хандивлагч гэдгийг тэр бүр сайн мэдэхгүй. Түүний “Paul E. Singer Family Foundation” сан нь “Harvard Graduate School of Education”, “Food Bank For New York City” зэрэг бусад хандивын сангуудад томоохон дүнтэй хандив өргөж байсан. Түүнчлэн тэрбээр амьдралынхаа цаг хугацаанд өөрийн хөрөнгийн тал хувийг хандивлах амлалт өгөөд амжсан билээ.
“САНХҮҮГИЙН ЗАХ ЗЭЭЛИЙН УНАЛТ, ӨСӨЛТИЙГ ДАГАЖ ДАЙВАЛЗАХ БУС ӨӨРИЙН ХУВЬ ЗАЯАГ УДИРД.”
Пол Сингер
Э.МАРАЛГОО
