НҮБ-ын дайны гэмт хэргийн шүүх хуралд хоёр удаа ерөнхий прокурорын үүрэг гүйцэтгэж байсан Карла Дель Понте ОХУ-ын ерөнхийлөгч Владимир Путиныг баривчлах тушаал гаргахыг Олон улсын эрүүгийн шүүхэд уриалсан болохыг Швейцарийн “Le Temps” сонин бямба гарагийн дугаартаа нийтэлжээ.
1999-ээс 2007 оны хооронд Югославын болон Руандагийн дайны гэм буруутнуудыг шүүх ажиллагааг хянан ажиллаж байсан тэрбээр “Путин бол дайны гэмт хэрэгтэн” хэмээн тус ярилцлагадаа дурдсан байна.
Путиныг баривчлах олон улсын тушаал гаргаснаар түүний Оросын газар нутгийг орхин гарах эрх нь хязгаарлагдахын зэрэгцээ “өөрийнх нь эсрэг олон улс нэгдэн зогсож буйг сануулсан арга хэмжээ болно” хэмээн Дель Понте өгүүлжээ.
Өнгөрсөн ням гарагт Оросын цэрэг ухарсны дараа Киевийн ойролцоох Буча хотоос 400 орчим энгийн иргэнийг бөөнөөр нь оршуулсан булш олдсон явдал, мөн Украины цэргүүд Оросын олзлогдсон цэргүүдийг буудаж, тамлан зовоож байгаа тухай мэдээлэлтэй холбогдуулан тэрбээр дайсагнагч хоёр талыг хоёуланг нь дайны гэмт хэрэгт сэжиглэн шалгах хэрэгтэй гэсэн санааг мөн илэрхийлжээ.
Эх сурвалж: Forbes
