Пүрэв гарагт хойд хөршийн засгийн газраас цахим нэвтэрхий толь “Wikipedia” сайтыг Украин дахь Оросын эзлэн түрэмгийллийн тухай Кремлийн эх сурвалжаас зөрсөн мэдээллээ устгахгүй бол 4 сая рубль буюу 49 мянга гаруй ам.доллар хүртэлх мөнгөн торгууль ногдуулна хэмээн сүрдүүлжээ. Энэ нь Оросын төрөөс хэвлэл мэдээлэлд хатуу хяналт тавьж, олон нийтэд дайны тухай тэнцвэртэй мэдээлэл очих боломжийг хязгаарлаж буй оролдлогын нэг хэсэг болж байна.
ОХУ-ын хэвлэл мэдээллийн зохицуулах байгууллага “Роскомнадзор” сайн дурынхны хөтлөн явуулдаг “Wikipedia” сайтыг Оросын ард иргэдэд дайны тухай худал мэдээлэл түгээж байна гэж үзэн дээрх шаардлагыг тавьсан мэдэгдэл хүргүүлжээ.
Гэхдээ “Роскомнадзор” тус мэдэгдэлдээ “худал мэдээлэл” гэж яг ямар мэдээллийг хэлж буйгаа тодорхой дурдаагүй аж.
Харин “Wikipedia”-д ажилладаг Оросын нийтлэгчдийн ярьснаар “Роскомнадзор” дайнд амиа алдсан украин иргэдийн тоо болон оросын цэргүүдийн хохирлын тоог дурдахдаа Украины эх сурвалжийг ашиглахгүй байхыг шаардаж, тус сайтын хандалтыг Орост хаахаар сүрдүүлсэн бололтой.
