АНУ-д автомат жолоодлоготой такси буюу “роботакси”-г анх нэвтрүүлсэн “Waymo” компани үйлчилгээний хүрээгээ тэлж Сан-Франциско хотод үйл ажиллагаа явуулж эхэлжээ. The Alphabet компанийн эзэмшдэг тус компани өмнө нь зөвхөн Аризона мужийн Финикс хотын төв хэсэгт жолоочгүй таксигаар үйлчилж байв.
Анх 2020 оноос тэд камер, лазер мэдрэгч, компьютерээр тоноглосон Jaguar I-PACE цахилгаан автомашинаар Сан-Францискогийн гудамжуудад туршилт хийж эхэлжээ. Харин одоогоор энгийн хэрэглэгчид бус зөвхөн Waymo-ийн ажилтнууд жолоочгүй таксигаар зорьсон газраа хүрэх боломжтой аж.
Сан Франциско шиг хөл хөдөлгөөнтэй, шигүү суурьшилтай хотод жолоочгүй таксины үйлчилгээ нэвтрүүлсэн нь энэ технологийн хувьд томоохон ололт болж байна. Хэдийгээр олон тэрбум долларын хөрөнгө зарцуулж хөгжүүлэлт хийсэн ч жолоочгүй такси нь бодит байдал дээр хэдэн жилийн өмнө тооцоолж байснаас илүү түвэгтэй, чадвар сорьсон ажил гэдэг нь тодорхой болсон юм.
“Waymo”-оос гадна “Amazon”-ийн эзэмшдэг Zoox, “General Motors”-ын Cruise компаниуд мөн Сан-Францискод хотод дээрх үйлчилгээг үзүүлж эхлэхээр төлөвлөөд байгаа аж.
Эх сурвалж: Forbes
