АНУ-ын Сангийн яамнаас “Клептократ хөрөнгийг нөхөн сэргээх үйл ажиллагааг урамшуулах” шинэ хөтөлбөрийг танилцуулсан байна. Үүний дагуу Оросын олигархууд, албан тушаалтнуудын авлигаар олсон хөрөнгө, орлогыг илрүүлж, хураан авахад тусалсан мэдээлэгчид болон шүгэл үлээгчдэд мөнгөн урамшуулал олгох аж.
Ялангуяа АНУ-ын хоригт орсон Оросын элитүүд, тэдний гэр бүлийн гишүүдийн эзэмшдэг үл хөдлөх хөрөнгө, тансаг орон сууц, хувийн хөлөг онгоц, бэлэн мөнгө зэрэг хууль бус аргаар олсон хөрөнгийг илрүүлж битүүмжлэхээр төлөвлөжээ. Мөн тус улсын Сангийн яам нэн тэргүүнд хөрөнгийг нь хураах Александр Бабаков, Виктор Золотов тэргүүтэй 28 олигархийн жагсаалтыг гаргажээ.
Энэ нь Вашингтоноос Путин болон түүний ойрын хүмүүсийг Украинд эхлүүлсэн дайнаа зогсоохыг шаардан шахалт үзүүлж буй өөр нэгэн арга болж байна.
Эх сурвалж: Forbes
