ОХУ Украин руу довтолсон явдалтай холбогдуулан улс орныхоо үндэсний аюулгүй байдалд заналхийлэл учирч болзошгүй гэсэн шалтгаанаар АНУ болон барууны орнууд Оросын дипломатуудыг албадан гаргаж байгаа билээ. Тэгвэл хамгийн сүүлд Нидерланд, Бельги, Ирланд, Чех гэсэн Европын дөрвөн улс ижил арга хэмжээ авсан байна.
Өнгөрөгч мягмар гарагт Нидерландын засгийн газраас ОХУ-ын өнөөгийн хандлага болон улсынхаа үндэсний аюулгүй байдлыг авч үзээд Оросын итгэмжлэгдсэн дипломатчийн байр суурь бүхий тагнуулын 17 ажилтанг албадан гаргажээ.
Тухайн өдөр мөн Бельгийн Гадаад хэргийн сайд тагнуулын үйл ажиллагаа явуулсан, үндэсний аюулгүй байдалд заналхийлэл учруулсан гэсэн шалтгаанаар Оросын 21 дипломат ажилтанг албадан гаргасан байна.
Харин Ирландын Гадаад хэргийн сайд мягмар гарагт гаргасан мэдэгдэлдээ дипломат харилцааны олон улсын стандартад нийцээгүй үйлдэл гаргасан гэсэн шалтгаанаар Оросын дөрвөн дипломат ажилтанг тус улсыг орхин гарахыг шаарджээ.
Мөн дээрхтэй ижил шалтгаанаар Чехийн Гадаад Хэргийн сайд Оросын дипломат албаны нэг ажилтанг албадан гаргах шийдвэр гаргаснаа Оросын Элчин Сайдын Яаманд мэдэгдсэн болохоо дурджээ.
Эх сурвалж: Forbes
