Энэ жил Хятад улс үндэсний нийт бүтээгдэхүүнийхээ өсөлтийг зорилтот хэмжээ болох 5.5 хувьд хүргэж чадах эсэх асуудал дээр олон орны эдийн засагчид анхаарлаа хандуулж байна. Гэвч Азийн хамгийн том эдийн засагтай Хятад улсын бодлого дэлхийн эдийн засгийн тогтолцоонд сөргөөр нөлөөлж болзошгүйг “хоёр чухал тоо баримт” харуулж байгаа юм.
Эхнийх нь covid 19-ийн халдварын тархалтыг хязгаарлахаар хөл хорио тогтоосон Шанхай хотын иргэдийн тоо буюу 62 сая. Өөрөөр хэлбэл Хятадын тус хотын хүн ам “Их долоо”-ийн гишүүн Итали болон Францын хүн амтай ойролцоо байдаг. Тэгвэл Хятадын эрх баригчид цар тахал эхэлснээс хойших хамгийн том хөл хорионы дэглэмийг Шанхай хотод есөн өдрийн турш тогтоохоор шийджээ.
Хоёр дахь нь Хонконг дахь Хятад их сургуулийн эдийн засагч Майкл Сонгийн тооцооллоор Хятад улс covid 19-ийн бодлогодоо нэг сарын хугацаанд зарцуулж буй ДНБ-ий хэмжээ буюу 46 тэрбум ам.доллар. Энэ тоо нь Венесуэль улсын ДНБ, эсвэл Исланд, Замби улсуудын эдийн засгийг нийлүүлснээс ч их байгаа юм.
Ийнхүү ихээхэн алдагдалд орох болсон шалтгаан нь Хятадын ерөнхийлөгч Ши Жиньпин хатуу хязгаарлалт, хөл хорионы дэглэмээр вирусийн тархалтыг зогсоох “zero Covid” бодлогыг баримталсаар байгаатай холбоотой аж. Эрүүл мэндийн мэргэжилтнүүд, эдийн засагчид, геополитикийн мэргэжилтнүүд “zero Covid”-ийн сөрөг үр дагаврын тухай анхааруулж, иргэдийн зүгээс ч шүүмжлэл гарсаар байгаа.
Хятад дахь хөл хорио энэ хэвээр үргэлжилвэл тус улс ДНБ-ийхээ 3.1 хувийн алдагдал хүлээж болзошгүйг эдийн засагч Майкл Сонг “Bloomberg”-т өгсөн ярилцлагадаа дурджээ.
Эх сурвалж: Forbes
