Арабын булангийн чинээлэг орнуудын нэг Катар улс 2022 оны 11-р сарын 21-нээс 12-р сарын 18-ны хооронд нутагтаа зохион байгуулах хөлбөмбөгийн ДАШТ-ний бэлтгэлд багагүй хөрөнгө зарцуулж байна.
Нийт хөрөнгийн хэмжээгээр дэлхийд дөрөвт бичигддэг Катар улс зөвхөн ДАШТ-ний үеэр ирэх жуулчдын хэрэгцээг хангах бус цаашид аялал жуулчлалаа өргөжүүлэх зорилгоор 100 гаруй зочид буудал болон түр хугацаанд байрлах боломжтой орон сууц барихаар төлөвлөжээ. 2022 оны хөлбөмбөгийн дэлхийн аварга шалгаруулах тэмцээнийг үзэхээр 1.5 сая орчим жуулчин Катарт ирж, 20 орчим тэрбум ам.долларын ашиг оруулах төлөвтэй байгаа аж.
Түүнчлэн Катарт зочилсон хөлбөмбөгийн олон фанатуудад үйлчлэхээр 16 аяллын хөлөг онгоцыг “хөвдөг” зочид буудал болгон ашиглах юм байна. Тус улсын аялал жуулчлалын төвийн мэдэгдсэнээр жуулчид тоглолт үзэхийнхээ хажуугаар тус орны соёлтой танилцах аяллын хөтөлбөрт олноор хамрагдах аж.
Тэмцээн өндөрлөсний дараа зарим цэнгэлдэх хүрээлэнг буулгах, эсвэл энтертайнмент төв, концертын ордон болгон хувиргахаар төлөвлөжээ. Мөн эдийн засаг, байгаль орчны тогтвортой байдлыг хангах үүднээс цэнгэлдэх хүрээлэн барихад ашигласан ихэнх материал, гол бүтэц эд ангиудыг буурай хөгжилтэй орнууд руу тусламж болгон илгээх юм байна.
Ингээд Катарт шинээр баригдах зочид буудлуудаас таны анхаарлыг хамгийн ихээр татах бүтээн байгуулалтуудыг онцлон хүргэж байна.
- Banyan Tree Doha
Сингапурын “Banyan Tree” компанийн Ойрхи Дорнод дахь анхны бүтээн байгуулалт болох тэнгэр баганадсан “Banyan Tree Doha” зочид буудал хөлбөмбөгийн фанатуудын анхаарлыг татах нь гарцаагүй юм.
Тэмцээн зохион байгуулагдах таван цэнгэлдэх хүрээлэн болон фанатуудын цугларах гол цэгтэй хамгийн ойрхон байрлалтай тус зочид буудлын рестораны хоолны цэс нь Энэтхэг, Тайланд, Итали үндэсний хоолны сонголтуудтай.
2. Fairmont & Raffles Lusail Hotel & Residences
Францын Accor компанийн тус зочид буудал Доха хотын хамгийн алдартай барилгуудын нэг Katara Towers ихэр цамхгийн дотор байрлана.
Катар улсын сүлдэн дээрх тахир сэлэмний загвараар баригдсан шинэхэн Katara Towers-ийн цонхоор нь далай, хотын үзэмжийг бишрэх боломжтой.
3. Pullman Doha West Bay
Энэхүү зочид буудал нь уулзалт, арга хэмжээний чиглэлээр голчлон үйл ажиллагаа явуулдаг “Pullman”-ы эзэмшлийн барилга юм. “Pullman Doha West Bay” нь Доха хотын үзэсгэлэн, конвеншн төвтэй ойрхон байрлана.
4. Dream Doha
265 энгийн өрөө, люкс өрөө, гуч гаруй хувийн сууцаас бүрдэх “Dream Doha” зочид буудал нь энэ жил Нажма дүүрэгт ашиглалтанд орох бөгөөд тансаг зэрэглэлийн зоог барих, үдшийг зугаатай өнгөрүүлэх сонголтууд нь гадна, дотны олон хүмүүсийн зорьж очих шалтгаан болох юм.
5. St. Regis Marsa Arabia Island, The Pearl-Qatar
Катарын нийслэл хотын хамгийн алдартай “The Pearl” дүүрэгт байрлах “The Pearl-Qatar” зочид буудал нь тансаг зэрэглэлийн зочид буудал хайж буй гэр бүлийн гишүүд, удаан хугацаагаар байрлах зочдод зориулсан 87 өрөөтэй барилга юм.
6. Le Royal Meridien Doha
Доха хотын хойд зүгт орших шинээр боссон Лусайл хотод баригдах “Le Royal Meridien Doha” зочид буудал нь жуулчид болон бизнесийн томилолттой хүмүүст зориулсан өөр олон шинэ зочид буудлуудтай хамт нээгдэх юм.
7. Rosewood Doha
Мөн Лусайл хотод баригдахаар төлөвлөгдөж буй “Rosewood Doha” барилгын загвар нь Катарыг хүрээлсэн шүрэн арлуудыг бэлгэджээ. Уг цогцолбор нь зочид буудлын өрөөнүүд, удаан хугацаанд байрлах зочдын орон сууц, хувийн орон сууцнуулаас бүрдэх аж.
