Ажлын байр өдөр ирэх тусам автомат горимд шилжиж буй өнөө үед хүний оролцоог өөр юугаар ч орлуулах боломжгүйг харуулж чадах гол хүчин зүйл нь “soft skill” юм.
Дотоод ур чадвар буюу “soft skill”-ийг таны ажлын арга барилтай шууд хамаарал бүхий техникийн бус ур чадвар гэж тодорхойлж болно.
The Wall Street Journal сонин 2016 онд энэхүү ур чадвартай холбоотой хамгийн түгээмэл асуултуудаар 900 гаруй удирдах албан тушаалтны дунд судалгаа явуулжээ. Судалгааны үр дүнгээс харахад тэдний 92 хувь нь харилцаа, санаачилга, зөрчилдөөний менежмент зэрэг дотоод ур чадварууд нь техникийн ур чадвар буюу “hard skill”-ээс ялгаагүй чухал ач холбогдолтой гэж үзсэн байна. Түүнчлэн судалгаанд оролцогсдын 89 хувь нь дээрх ур чадварыг эзэмшсэн ажил горилогчийг олоход маш хэцүү байдаг хэмээн хариулжээ.
RELATED STORIES
Ажиллах хүч шинэчлэгдэх тусам энэхүү ур чадвар аливаа байгууллагын амжилттай үйл ажиллагааны гол бүрдүүлэгч хэсэг болж байгаа тул “Forbes” сэтгүүлээс орчин үеийн ажил олгогчдын хамгийн түрүүнд шаарддаг таван “soft skill”-ийг жагсаасныг хүргэж байна.
1. Харилцаа
Бичгээр болон аман яриагаар, цахим орчинд болон биечлэн харилцах чадвар нь бүхий л “soft skill”-ийн жагсаалтын тэргүүнд байдаг. Энгийнээр тайлбарлахад энэ нь цэгцтэй ойлгомжтой ярьж бичих, мөн бусдын хэлснийг анхааралтай сонсож боловсруулах чадвар юм. Ялангуяа зайнаас ажиллах, хосолсон хуваариар ажиллах гэх мэтээр ажлын орчин илүү уян хатан болсон өнөө үед мэдээллийг үр дүнтэй хуваалцаж, хүлээн авч чаддаггүй ажилтан яваандаа багийн бусад гишүүдээс тусгаарлагдаж эхэлнэ.
Бусдад хувь нэмэр болохооргүй богинохон эсвэл гэнэтийн хариулт өгөх, бусдыг сонссоны дараа өөрийн харах өнцгийг өөрчлөхөөс татгалзах, сонсогчийн хариу үйлдэл, дотоод мэдрэмжийг үл ойшоох зэрэг нь үүний жишээ юм.
2. Идэвх зүтгэл
Ажил эхлэхээс 5 минутын өмнө ирж, ажил дууссанаас 5 минутын дараа харьж, тэр хоорондоо хийж байгаа зүйлдээ анхаарах нь идэвх зүтгэлийн хамгийн энгийн жишээ юм. Өөрөөр хэлбэл байгууллагынхаа зорилгод сэтгэл зүрхээрээ нэгдэж, гарах үр дүнд анхаарал хандуулж, өдөр бүр хамгийн сайнаараа ажиллах явдал.
Хэрэв та хийж буй ажилдаа үнэхээр хичээсэн ч идэвх гаргаж чадахгүй байгаа бол магадгүй та карьерын сонголтоо буруу хийсэн байж болох. Гэхдээ өөр салбарт хүч үзэхээсээ өмнө асуудлын гол нь хийж байгаа ажилд бус хийж байгаа хүнд нь буюу өөрт тань байгаа эсэхийг нягтлаад үзээрэй. Амжилттай хүний гол чанар бол хэдий мөрөөдлийн карьер нь биш байсан ч хариуцсан ажилдаа сэтгэлээсээ хандах явдал юм.
3. Багийн ажиллагаа
Хүн бүр л шинэ ажилд орохдоо “бусадтай сайн нийцдэг” эсвэл “багийн тоглогч” болохоо батлахаар яардаг. Энэ нь мэдээж маш чухал шалгуур боловч багийн ажиллагаа гэдэг ойлголтыг үүгээр тодорхойлох нь учир дутагдалтай.
Багийн ажиллагаа сайтай байх гэдэг нь зөвхөн хамт ажиллахад таатай хүн гэсэн үг биш. Харин аливаа хамтын ажиллагаанд идэвхтэй оролцох, шаардлагатай бүгдийг гүйцэтгэхийн тулд компанийн ямар ч ажилтантай саадгүй гар нийлэх чадвар, хүсэл эрмэлзэл гэж тодорхойлж болно.
4. Асуудал шийдвэрлэх чадвар
Асуудал шийдвэрлэх – энэ нь шүүмжлэлт сэтгэлгээтэй байхыг хэлнэ. Асуудалд өөр өнцгөөс хандаж, хүсээгүй үр дүнг хүлээн зөвшөөрдөггүй хүнийг энэ чадварыг онцгой эзэмшсэн гэж тодорхойлж болно. “Өмнө нь ингэж хийгээд болоод байсан юм” гэсэн хандлагаар зөвхөн дадаж сурсан арга барилд баригдахгүй байхыг энэ нь биднээс шаарддаг.
Хараахан тодорхой болоогүй байгаа асуудлыг ч урьдчилан харж, хэрхэн шийдвэрлэх аргачлалаа боловсруулж чаддаг хүмүүс байдаг. Мөн тэд “дажгүй”, “гайгүй” гэсэн үнэлгээ авах шийдэл дээр хэзээ ч тогтохгүй.
5. Манлайлал
Захирлын хувьд компанидаа ажиллаж буй бүхий л хүнийг тус тусын эзэмшсэн салбартаа “лидер” нь гэж үзэх ёстой. Өөрөөр хэлбэл тэрбээр бүх зүйлд эксперт байж чадахгүй учраас тэрхүү сул орон зайг нөхөж, өөрт нь байдаггүй авьяас, алсын харааг авчрах хүмүүст найдна гэсэн хандлагаар ажилд авах нь чухал.
Манлайлал гэдгийг зөвхөн аливаа зүйлийг хариуцан ажиллах чадвараар дүгнэх нь хангалтгүй. Харин тухайн хүний бүхий л “soft skill”-үүдийн нийлбэр гэж тодорхойлж болно. Манлайллын тусламжтайгаар тэрхүү бүх ур чадварыг тохиромжтой үед нь ашиглах боломжтой.
