Хоолны арвин сонголттой, хараа булаам түүхэн дурсгалт газарт хуримаа хийхийг мөрөөддөг хосуудын хувьд Итали улс төгс сонголт болдог. Гэвч цар тахал дэлхийн аялал жуулчлалын салбарт арилшгүй толбо үлдээсэн энэ үед Италийн нэгэн муж хосуудын хуримаа хийдэг гол цэг гэсэн байр сууриа 2022 онд эргүүлэн олж авахаар хичээж байна.
Тодруулбал 2022 оныг дуустал тус улсын Лацио мужид гэрлэсэн хосуудад хуримын зардлаас нь 2000 евро (2250 ам.доллар) буцаан олгохоор санал болгож байгаа аж. Колизейн театр, Тревигийн усан оргилуур, Испани маягийн шат гээд хуримын зураг авалтад тохиромжтой цэгүүдийг багтаасан Ром хот тус мужийн нутагт оршдог билээ.
Нийт 10 сая еврогийн өртгөөр зохион байгуулж буй “Nel Lazio con amore” буюу “Лациогоос хүндэтгэн ёслов” нэртэй энэхүү хөтөлбөрийн дагуу хүмүүс аль орны иргэн байхаас үл хамааран ердөө таван ширхэг төлбөрийн баримт үзүүлээд мөнгөө буцаан авах боломжтой аж. Үүнд хуримын зурагчин, баярын бялуу, катеринг, хуримын даашинзны урлал зэрэг үйлчилгээний зардал багтаж болох юм байна.
Лацио мужийн захирагч Никола Зингаретти “Эдийн засгийн хямралд хамгийн их хохирол амссан салбартаа тусламж үзүүлэхээр энэ хөтөлбөрийг эхлүүлсэн. Өөр юутай ч харьцуулшгүй соёлын үнэт өв, сэтгэл татам үзэсгэлэнтэй газар олон болохоор бид мужийнхаа аль ч хэсгийг нүүр бардам үзүүлж чадна гэдгээрээ бахархдаг. Ийм учраас аялал жуулчлалын салбартаа ихээхэн анхаарч, багагүй хөрөнгө оруулалт хийгээд байна” гэжээ.
Дээрх урамшуулалд хамрагдахыг хүссэн хосууд 2022 оны арванхоёрдугаар сарын 31-нээс өмнө хуримаа хийсэн байх ёстой ч шаардлагатай төлбөрийн баримтыг 2023 оны нэгдүгээр сар дуустал бүрдүүлж өгөх боломжтой гэнэ. Энэхүү хөтөлбөрийн ачаар Лациод хуримаа хийх хосуудын тоо хэвийн хэмжээндээ эргэн очно гэдэгт орон нутгийн удирдлагууд найдаж байна. Цар тахал эхэлснээс хойш тус мужид нийт 9000 хос хуримаа хийсэн бол 2019 онд 15 мянган хос хуримлаж байжээ.
Эх сурвалж: Forbes
