Шилдэг 30 залуу энтрепренерийг тодруулна
Forbes сэтгүүлээс жил бүр “30 Under 30” буюу “30 нас хүртэлх 30” шилдэг бизнес эрхлэгчийг тодруулж зарладаг. Зах зээлийн мэдрэмж, манлайлагчийн шинж чанараа дэлхий дахинд батлан харуулж, ирээдүйн тоглоомын дүрмийг өөрчлөгч залуусаас сорчлон эрэмбэлдэг уг жагсаалтыг 10 дахь жилдээ толилуулаад байгаа билээ.
Дэлхийн шилдэг бизнес эрхлэгчдийн амжилтын түүхийг Монгол хэлээр уншигчдадаа хүргэдэг Forbes Mongolia сэтгүүл анхны дугаараа уншигчдадаа хүргээд мөн 10 жил болж байна. Өнгөрсөн хугацаанд Монголын бизнес эрхлэгчид, стартапууд, инновац нэвтрүүлэгчид гээд манай улсын бүхий л салбар үйл ажиллагаа явуулж буй манлайлагчдын түүх, туршлагыг олон нийтэд хүргэж ирсэн юм.
Энэ хүрээндээ Forbes Mongolia сэтгүүл Монголын “30 хүртэлх 30” эрэмбийг гаргаж бизнес, эдийн засаг, нийгэмд инновац, чиг хандлагыг тодорхойлж буй шилдэг энтрепренерүүдийг тодруулахаар болжээ.
Эерэг өөрчлөлт авчирч, манлайлж, үлгэрлэж байгаа залуу манлайлагчдыг нэгтгэдэг гэдгээрээ хүлээн зөвшөөрөгдсөн энэхүү жагсаалтад боловсрол, санхүү, эрүүл мэнд, эрчим хүч, технологи, урлаг, спорт гээд салбар үлдээлгүй шилдгүүдийг тодруулдаг бөгөөд хүчирхэг залуусаас бүрдсэн дэлхийн томоохон хүрээллийг бий болгож байна.
