АНУ-ын Ерөнхийлөгч Жо Байден өчигдөр гэр бүл, эрүүл мэнд, боловсрол, байгаль орчны хөтөлбөрүүдийн зардлыг нэмэгдүүлэх төсвийн төслийг танилцууллаа. Уг төсөл нийт 1.75 их наяд ам.доллараар хэмжигдэж буй бөгөөд өнгөрсөн наймдугаар сард танилцуулсан 3.5 их наяд ам.долларын төсвийн төслийг багасгасан хувилбар юм.
Тэрбээр Шотландын Глазго хотноо болох “COP26” уур амьсгалын асуудлаарх дээд хэмжээний уулзалтад оролцохоосоо өмнө Төлөөлөгчдийн танхимын Ардчилсан намын гишүүдтэй уулзаж, нийгмийн нэн чухал асуудлуудыг багтаасан багцын төслийг дэмжүүлэхээр оролджээ. Одоогоор тус төсөлд хэн хэн гарын үсэг зурсан нь тодорхойгүй хэвээр байна.
Энэхүү төсвийн төсөлд дараах заалтуудыг багтаажээ.
Үүнд, 3, 4 настай хүүхдүүдийн сургуулийн өмнө боловсролд зургаан жилийн хугацаатай санхүүжилт олгох, хүүхэд асрах зардлыг улсын орлогоос 7 хувиар хэтрүүлэхгүй байх, улсын дундаж орлогоос 250 хувиас ихгүй байхаар хязгаарлах, ахмад настан болон хөгжлийн бэрхшээлтэй иргэдэд халамж олгох, хүүхдийн татварын хөнгөлөлтийг нэг жилээр сунгах, цэвэр эрчим хүчний татварын хөнгөлөлтөд 320 тэрбум ам.долларыг зарцуулах, иргэний цаг уурын байгууламжийг барихад 105 тэрбум ам.долларын санхүүжилт олгох, Цэвэр эрчим хүчний технологи, үйлдвэрлэл, нийлүүлэлтийн сүлжээнд 110 тэрбум долларын санхүүжилт олгох, худалдаа үйлчилгээний тухай хуулийн татварын хөнгөлөлтийн хугацааг 2025 он хүртэл сунгах, орон сууцны зээлд 150 тэрбум ам.доллар, ‘Pell’ тэтгэлгийн дээд хэмжээг нэмэгдүүлэх, ЕБС-ын үдийн хоолны хөтөлбөрийг өргөжүүлэх, цагаачлалын шинэчлэлтэд 100 тэрбум ам.долларын санхүүжилт олгох, хүүхэдгүй ажилчдад орлогын албан татварын хөнгөлөлтийг нэг жилээр тус тус сунгасан шийдвэрүүд багтжээ.
Мөн томоохон корпорац, компаниудад 10 сая ам.долларын дээш орлоготой бол 5 хувь, 25 сая ам.доллараас дээш орлоготой бол 3 хувь, томоохон орпорацуудад 15 хувийн нэмэлт татвар ногдуулах зэрэг нийгэм, байгаль орчинд чиглэсэн чухал шийдвэрүүдийг багтаасан аж.
Эх сурвалж: Reuters
