Хэрвээ бизнесээ амжилттай удирдахыг хүсэж буй бол дижитал шилжилтийн давалгаанд заавал нэгд гэсэн зарчим бүхий л салбарт үйлчилж байна. .
Сүүлийн жилүүдэд банкны бүтээгдэхүүн, үйлчилгээнд инновацийг түлхүү нэвтрүүлж, үндэсний хэмжээний цахим банкны сүлжээг бүрдүүлэхийг эрмэлзэж буй ХААН Банкны гүйцэтгэх захирлаар томилогдоод удаагүй Рэнцэнбатын Мөнхтуяатай ярилцлаа
Хаан банкны гүйцэтгэх захирал
Сүүлийн жилүүдэд бизнесийн салбар бүрт технологийн оруулах хувь нэмэр өсөж, бизнесүүд бүтээгдэхүүн, үйлчилгээндээ инноваци нэвтрүүлсэн байдлаараа өрсөлдөж байна. Цахим зуунд монголчуудын 68 хувь нь ямар нэгэн байдлаар сошиал медиа платформ ашиглаж, давхардсан тоогоор 900 мянган хүн цахим банкны үйлчилгээг ашигладаг гэсэн судалгаа байна.
“Банк санхүү, технологийн хэрэглээгээрээ бид Америк, Европын түвшинд хүрсэн” хэмээн ХААН Банкны гүйцэтгэх захирал Р.Мөнхтуяа өгүүлж байна. 2014 оноос дижитал стратегиа тодорхойлон үүнийхээ дагуу ажилласан ХААН Банкны цахимаар болон салбар нэгжид хийгдэж буй санхүүгийн гүйлгээний харьцаа 2020 оны байдлаар 97:3 болж өөрчлөгджээ. “Технологийн дэвшил нь банк санхүүгийн салбарт олон давуу тал олгож байгаа бөгөөд ХААН Банкны мэдээлэл технологийн газар томоохон IT компанийн хүний нөөц, хүчин чадалтай дүйхүйц болсон. Бид цаашид санхүүгийн бус гүйлгээг цахимжуулахаар зорин ажиллаж байна” хэмээн Р.Мөнхтуяа онцлов.
Дэлхий дахинд санхүүгийн томоохон байгууллагууд өөрсдийн үйл ажиллагаанд хэрэгтэй функцуудыг тодорхой шаардлагын дагуу финтек, стартап компаниудаар хийлгэж байна.
2020 он бизнесийн бүхий л салбар, дэлхийн бүх улс орны хувьд амаргүй жил болж өнгөрлөө. Covid-19 цар тахал харилцагчдын бизнесийн орлого, бэлэн мөнгөний урсгал тасалдах, улмаар зээлийн эргэн төлөлтийг хугацаанд нь хийх боломжгүй байдал үүсгэх зэргээр банкны салбарт ч нөлөөллөө үзүүллээ. Цар тахлаас шалтгаалан Монгол Улсын гадаад худалдааны эргэлт 2020 онд өмнөх оноос 10 гаруй хувиар буурав. Ялангуяа уул уурхайн салбарын эскпорт буурснаас үүдэн тээвэр, жижиглэн худалдааны салбарт хүртэл нөлөөлж цаашлаад эдийн засгийн идэвхжил буурсаар байна. 2020 онд эдийн засаг -5.3 хувиар агшсан гэх урьдчилсан таамаг гараад байна. Мэдээж эдийн засгийн орчин хүндрэх нь банкны секторын зээлийн чанарт сөргөөр нөлөөлдөг. Өөрөөр хэлбэл, банкны секторын чанаргүй зээлийн багц 2019 онд 9.9 хувь байсан бол 2020 онд 11.5 хувь болж өссөн байна. ХААН Банкны чанаргүй зээл ч мөн адил 2019 онд 6.17 хувь байсан бол 2020 онд 6.7 хувь болж өсчээ. Гэвч ХААН Банкны хувьд сүүлийн жилүүдэд цахим бүтээгдэхүүн үйлчилгээ хөгжүүлэх төсөл, хөтөлбөрүүдийг хэрэгжүүлж, томоохон хэмжээний хөрөнгө оруулалт хийж байсны үр дүнд цар тахлын үед харьцангуй сайн ажиллаж байна хэмээн гүйцэтгэх захирал Р.Мөнхтуяа онцоллоо. Нөгөө талд тэд харилцагчдаа банкны бүтээгдэхүүн үйлчилгээг цахимаар авахыг урамшуулж, илүү олон харилцагч банканд биечлэн ирэхээс урьдчилан сэргийлж байгаа тухай тэрбээр хэлж байв.
Өдгөө Монголын нийт айл өрхийн 70 гаруй хувь буюу давхардсан тоогоор 2.5 сая харилцагч ХААН Банкаар үйлчлүүлдэг. 2020 оны эцсээр ХААН Банкны нийт татан төвлөрүүлсэн хөрөнгө 10.3 их наяд төгрөг, харин нийт активын хэмжээ 12.2 их наяд төгрөгт хүрсэн байна. Энэ нь 12 арилжааны банк үйл ажиллагаагаа явуулдаг Монголын банкны системийн 33.2 хувийг ХААН Банк дангаар эзэлж буйг илтгэх баримт юм. Монгол Улсын Топ-100 аж ахуйн нэгжийн жагсаалтад сүүлийн дөрвөн жил дараалан дөрөвдүгээрт эрэмбэлэгдэж, хамгийн их татвар төлдөг, хамгийн олон хүнийг ажлын байраар хангадаг зэргээр нь ХААН Банкны өнгөрсөн хугацаанд Монголын эдийн засаг, болоод нийгмийн хөгжилд оруулсан нөлөө, үнэ цэнийг дурдаж болно.
2000 оноос ХААН Банканд ерөнхий нягтлан бодогчоор анх ажиллаж эхэлсэн Р.Мөнхтуяа Санхүү хариуцсан дэд захирал, Байгууллагын банк хариуцсан дэд захирал, Гүйцэтгэх захирлын орлогчоор ажиллаж байсан туршлагатай нэгэн. Энэ ч утгаараа дотоодын банкны салбарт 30 жилийн турш үйл ажиллагаагаа тогтвортой явуулж буй ХААН Банк өнөөдрийн түвшинд хүрэхэд түүний оролцоо, хувь нэмэр тун өндөр аж. Гүйцэтгэх захирлаар томилогдоод удаагүй ч 26 жилийн турш Монголын банк, санхүүгийн салбарт ажилласан банкирын хувьд Р.Мөнхтуяа Монголын банкны салбарт өнөөдрийн өргөн дэд бүтцийг бий болгож чадсан ХААН Банкны амжилтыг банкны дотоод процессоо сайжруулах, ажилтнуудынхаа дижитал сэтгэлгээг төлөвшүүлэхэд голлон анхаарч ажилласан туршлагатайгаа холбон тайлбарлаж байна.
Сүүлийн жилүүдэд Монголын санхүүгийн салбарт бичил зээл олгогч финтек компаниудын үйл ажиллагаа идэвхжиж байна. Энэ чиглэлд ХААН Банкны баримталж буй байр суурийг “Дэлхий дахинд санхүүгийн томоохон байгууллагууд өөрсдийн үйл ажиллагаанд хэрэгтэй функцуудыг тодорхой шаардлагын дагуу финтек, стартап компаниудаар хийлгэж байна. Бид сүүлийн гурван жилийн хугацаанд ПОС төхөөрөмжийн хөгжүүлэлт, АТМ-ийн үйл ажиллагаа, цэнэглэлт, засвар үйлчилгээ, QR кодод суурилсан төлбөр тооцооны шийдэлд дотоодын гурван финтек компанитай хамтран ажиллаж байна. Энэ нь бидний хувьд өөрсдийн үндсэн үйл ажиллагаандаа төвлөрч ажиллах боломжийг олгодог. Цаашдаа банк бүхнийг өөрөө хийдэг загвар хуучирна гэж харж байна” хэмээн тэрбээр ярилаа.
ХААН Банк цахимаар, зайнаас үзүүлж болох бүх боломжит бүтээгдэхүүн үйлчилгээнүүдээ 100 хувь цахим болгож, харилцагч банканд ирж үйлчилгээ авахын тулд цаг хугацаа, зардал гаргадаг цаг үеийг халахад бүхий л үйл ажиллагаа, төлөвлөлтөө чиглүүлж буй аж. Ирэх жилүүдэд ч мөн харилцагч төвтэй байх гэсэн үндсэн стратегийнхаа хүрээнд зээлийн үйлчилгээг автоматжуулах, улмаар тухайн үйл ажиллагаанд зарцуулж буй зардлаа хэмнэх, зээлийн хүүг буруулах зорилт тавин тогтвортой санхүүжилт, бизнесийн эрүүл өсөлтийг дэмжиж ажиллахаа Р.Мөнхтуяа захирал хэлэв.
