Дэлхийн томоохон автомашин үйлдвэрлэгч компаниуд магнийн нийлүүлэлтийн сүлжээ тасалдаж буйд санаа зовниж байна. Тодруулбал, Хятад улсад эрчим хүчний хямрал үүсээд буйтай холбоотойгоор тус улс цахилгаан эрчим хүч хэмнэх бодлогыг баримталж, магнийн үйлдвэрлэл явуулдаг 50 компанийн 35-ыг нь он дуустал үйл ажиллагааг нь зогсоогоод байна.
Үүнтэй холбоотойгоор газрын ховор элементийн экспорт саарч, хөнгөн цагаан үйлдвэрлэлд төвөгтэй нөхцөл байдал үүсгээд буйг Германы металл үйлдвэрлэлийн холбооноос өчигдөр /2021.10.19/ мэдээллээ.
Тус холбооны мэдээлснээр, одоогоор Европт 11 сар хүртэлх магнийн нөөц байгааг дуулгаад байна. Хэрвээ цаашид нийлүүлэлтийн хомстол үргэлжилбэл, автомашины үйлдвэрлэлээс эхлээд нисэх онгоц, унадаг дугуй, барилга, сав баглаа боодлын үйлдвэрт нөлөөлж, хөнгөн цагааны нэмүү өртөг шингэсэн бүхэл бүтэн сүлжээнд үйлдвэрлэлийн асар их алдагдалд орохыг сануулав.
Өнөөдрийн байдлаар дэлхий дээр хөнгөн цагааны гол түүхий эд болох магнийг орлох элемент байхгүй нь нөхцөл байдлыг улам хүндрүүлж буйг шинжээчид үзэж байна.
‘Barclays’-ийн шинжээч Амос Флетчер “Магнийн эрэлтийн 35 хувийг автомашины хуудас металл эзэлдэг. Хэрвээ магнийн нийлүүлэлт тэг зогсвол автомашины үйлдвэрлэл дагаад зогсох эрсдэлтэй” болохыг Financial Times-д өгсөн ярилцлагадаа дурджээ.
Уг асуудал Хойд Америкт хүртэл нөлөөлөөд байгаа бөгөөд хөнгөн цагаан бэлдэц үйлдвэрлэдэг Канадын ‘Matalco’ компани нийлүүлэлтийн хомстол удаан үргэлжилбэл үйлдвэрлэлийн хэмжээгээ бууруулах хэмжээнд хүрэхээ мэдэгдээд байна.
Эх сурвалж: Financial times
