Дэлхийн уул уурхайн хамгийн том компани болох ‘BHP’-ийн төмрийн хүдрийн ‘Jimblebar’ уурхайд засварын ажил болон цар тахлын хязгаарлалт тогтоосонтой холбоотойгоор ажиллах хүчний тоо буурч, тус компанийн төмрийн хүдрийн олборлолт гуравдугаар улиралд 5 хувиар буурсан үзүүлэлттэй гарчээ.
Өнгөрсөн долоо хоногт түүний гол өрсөлдөгч ‘Рио тинто’ групп төмрийн хүдрийн нийлүүлэлтээ бууруулж байгаагаа мэдэгдээд байсан байсан. Тэгвэл ‘BHP’ компани жилийн үйлдвэрлэлийн урьдчилсан тооцооллоосоо бууруулахгүй байхаар шийдвэрлэжээ.
Тус компани 2020 оны зургадугаар сард Баруун Австралиас 72.8 сая тонн төмрийн хүдэр олборлосон бол энэ оны есдүгээр сард 70.6 сая тонн болж буурчээ. Энэ нь өмнөх жилийнхээс 2 сая гаруй тонноор буурсан дүн юм.
Өнгөрсөн наймдугаар сард ‘BHP’ компанийн хувьцааны ханш сүүлийн 10 гаруй жилийн хугацаанд дахь үр дүнтэй харьцуулахад дөрөвний нэгээр буурсан үзүүлэлттэй гаргасанг ‘Reuters’ онцолж байна. Харин Мягмар гаригийн үзүүлэлтээр хувьцааны ханш 1.5 хувиар буурсан байна.
Мөн ‘Woodside Petroleum’ компани ‘BHP’ компанийн газрын тосны бизнесийг худалдан авах хэлцэл урагштай байгааг бид өмнө мэдээлсэн. Тэгвэл хамгийн сүүлийн мэдээллээр тус компанийн газрын тосны үйлдвэрлэл гурван хувиар өсөж, 27.5 сая баррель болжээ.
Харин төмөрлөгийн нүүрсний олборлолт 9 хувиар буурч, 8.9 сая тонн, эрчим хүчний нүүрсний үйлдвэрлэл 17 хувиар өсөж, 4.2 сая тонн тус тус болсон байна.
Эх сурвалж: Reuters
