Дэлхийн зэсийн хоёр дахь томоохон олборлогч болох Перу улсад улс төрийн тэмцэл хөдөлгөөн өрнөж, тус улсын нийлүүлэлт тасалдсанаас үүдэн зэсийн үнэ дахин өслөө. Тодруулбал, өнгөрсөн Лхагва гаригт /2021.10.06/ Перу улсын Эспинар мужийн уугуул иргэд ‘Glencore PLC’ -ийн ‘Antapaccay’ зэсийн уурхайг байгаль орчинд сөргөөр нөлөөлж байна хэмээн эсэргүүцлээ илэрхийлж, уурхайн гол замыг бүслэн хааж, тодорхойгүй хугацаагаар тэмцлээ өрнүүлж байна.
Энэ хүрээнд арванхоёрдугаар сард нийлүүлэх зэсийн үнэ Лхагва гарагийн /2021.10.06/ хаалтын ханшнаас 2.2 хувиар өсөж, фунт тутам 4.240 доллар /тонн тутам 9.328 ам.доллар/ хүрлээ.
Мөн Шанхайн Фьючерсийн Биржийн агуулах дахь зэсийн нөөц 2009 оны 6-р сараас хойш үзэгдсэн хамгийн доод төвшинд хүрээд байгаа бол Лондонгийн Металлын Бирж дээр 90725 тонн болж, долоо хоногийн дотор 27%-иар буурсан үзүүлэлттэй байна.
Эх сурвалж: www.mining.com
