Монгол Улсын томоохон бүтээн байгуулалт, стратегийн үйлдвэр болох Газрын тос боловсруулах үйлдвэрийг барьж эхлүүлснээс хойш гурван жил өнгөрсөн бөгөөд төлөвлөсөн хугацаандаа ашиглалтад ороход гурав хүрэхгүй жил үлдээд байна. Энэ хүрээнд өчигдөр /2021.10.06/ УИХ-ын Үйлдвэржилтийн бодлогын байнгын хорооны ээлжит хуралдаанаар Газрын тос боловсруулах үйлдвэрийг дэмжих тухай хуулийн хэрэгжилт болон Дорноговь аймгийн Алтанширээ суманд баригдаж буй газрын тос боловсруулах үйлдвэрийн бүтээн байгуулалтын явцын талаар танилцуулсан байна.
Уг төсөл нь эдийн засгийн ач холбогдлоороо өндрөөр үнэлэгдэж байгаа бөгөөд үүний хажуугаар Тавантолгой-Зүүнбаян чиглэлийн 416.1 км төмөр замын ажил эрчимтэй өрнөж байна. Ингэснээр бид 2024 онд дотооддоо шатахуунаа үйлдвэрлэх боломж бүрдэж байна.
Үйлдвэр жилд 1.5 сая тонн түүхий тосыг боловсруулж, таван төрлийн 1.33 сая тонн бүтээгдэхүүн болгох бөгөөд нийт бүтээгдэхүүний 60 хувь нь дизель түлш, үлдсэн нь АИ-95 автобензин, шингэрүүлсэн шатдаг хий, онгоцны түлш байх төлөвлөлттэй. Түүнчлэн дотоодын дизель түлш болон автобензины 80 хувийн хэрэглээг хангахаар тооцож, нэгж бүтээгдэхүүний өртөг импортын ижил төрлийн бүтээгдэхүүнээс 25 орчим хувиар хямд байхаар төлөвлөж байгаа аж.
Мөн уг ажлын нэг хэсэг болох боловсрyyлах уйлдвэрийг тyyхий эдээр хангах Дорнод аймгийн Матад сумаас, Дорноговь аймгийн Алтанширээ сум дахь уйлдвэрийн байршил хуртэлх 560 орчим километр туухий тос дамжуулах хоолой байгуулах төслийн ажлыг эxлүүлээд байна.
Төслийн өдөр тутмын үйл ажиллагааг “Монгол газрын тос боловсруулах үйлдвэр” ТӨХХК хэрэгжүүлэн ажиллаж байгаа бөгөөд үйлдвэрийн бүтээн байгуулалтын ажлыг БНЭУ-ын Экспорт-Импортын (Эксим) банк, төслийн менежментийн зөвлөх компанитай зөвшилцөн технологийн бус барилга байгууламж, анхдагч процессын болон дагалдах байгууламж, үйлдвэрийн цахилгаан станц, лицензит технологийн байгууламж гэж 4 хэсэгт хуваан хэрэгжүүлж байгаа юм байна.
Үйлдвэрийн зам талбайн үерийн ус зайлуулах суваг шуудуу болон цуглуулах савны газар шороо, сувагчлалын суурь бетоны ажил 50 хувийн гүйцэтгэлтэй. Төслийн талбайд 2021.07.30-ны өдрийн байдлаар төслийн менежментийн зөвлөх компанийн 5, “JMC Projects India” компанийн 121 энэтхэг, дотоодын туслан гүйцэтгэгч 8 компанийн 280 монгол ажилчин ажиллаж байгаа аж.
Эх сурвалж: Монгол Улсын Их Хурлын Тамгын Газар
