Олон улсын сургалтын хөтөлбөрийг хэрэгжүүлэгч сургуулиуд Монголын боловсролын салбарт үйл ажиллагаагаа явуулах нь ирээдүйд монгол хүүхдүүдийг дэлхийд үнэлэгдсэн сайн боловсон хүчин болоход тустай талаар “English School of Mongolia” сургуулийн захирал Грэм Хилл өгүүлж байна.
Ази дахь Их Британийн олон улсын дунд сургуулиудын холбоо буюу FOBISIA-ийн Монгол Улс дахь цорын ганц гишүүн сургууль бол “ESM”. Тус холбоонд өдгөө Өмнөд Солонгос, Япон, Сингапур зэрэг өндөр хөгжилтэй орны сургуулиуд гишүүнээр элсээд байна. “Cambridge Assessment International Education”, “Duke of Edinburgh”, “British Schools Overseas”-тай хамтран ажилладаг нь тус сургуульд IB PYP (бага боловсролын хөтөлбөр), IB DP (дипломын хөтөлбөр), IGCSE (Кембрижийн дунд боловсролын хөтөлбөр) зэрэг хөтөлбөрийг хэрэгжүүлж байна. IB хөтөлбөрийг өдгөө 159 орны 5,500 гаруй сургууль хэрэгжүүлдэг. 3-9 насны хүүхдийн шүүмжлэлт сэтгэлгээ, асуудал шийдвэрлэх чадварыг хөгжүүлэхэд голчлон анхаардаг тус хөтөлбөр нь дэлхийн хаана ч өндрөөр үнэлэгддэг ажээ.
Цаашид Оксфордын хөтөлбөрийг хэрэгжүүлж эхлэх тухай тус сургуулийн захирал Грэм Хилл онцлов. Хилл бол Брайтон дээд сургууль болон Оксфордын их сургуулийг дүүргэсэн, Их Британийн боловсролын салбарт 30 жилийн турш ажилласан туршлагатай нэгэн. Эдгээр хөтөлбөр нь аль ч өндөр хөгжилтэй орны хүүхдийн мэдлэг, чадварыг сорьдог, олон улсад өндөр түвшний гэж үнэлэгддэг юм. “ESM” сургуулийн төгсөгчдөөс “Manchester University”, “University of Melbourne”, “University of British Columbia”, “Tsinghua University”, “Imperial College London” зэрэг дэлхийн шилдэг их, дээд сургуулиудад олон хүүхэд тэнцсэн нь тус сургуулийн хөтөлбөрүүдийн чансааг илтгэнэ. Сургалтын төлбөр дотоод дахь олон улсын дунд сургуулиудтай харьцуулбал харьцангуй хямд бөгөөд Хилл “Бид Монголын дундаж түвшний орлоготой өрхийн хүүхдүүдэд олон улсын стандартад нийцсэн, бүрэн итгэмжлэгдсэн сургуульд сурах боломжийг олгож, дэлхийд гарах үүд хаалгыг нь нээхэд туслахыг хүсдэг” хэмээн өгүүлэв.
Монголын боловсролын систем Орос суурьтай учраас монгол хүүхдүүд онолын мэдлэг өндөр, сэтгэн бодох чадвар сайтай гэж Хилл хэллээ. Түүний үзэж буйгаар энэ нь тэдний өрсөлдөх чадварт давуу тал үүсгэдэг аж. Мөн тэрбээр “Тэд нийгмийн идэвхтэй, хүсэл тэмүүлэлтэй, сэргэлэн цовоо, олон талын авьяастай байдаг. Дэлхийн шилдэг сургуулиуд эдгээр шинж чанарыг элсэгчдийнхээ гол шалгуур болгодог. Монгол хүүхдүүд хичээнгүйлэн зүтгэвэл тэдний хүрэх оргилын хязгаар нь “тэнгэр” байх болно” хэмээв. Тийм учраас тус сургууль сурагчдын хичээлээс гадуурх үйл ажиллагаанд онцгой ач холбогдол өгдөг. Тухайлбал жүжиг, театрын урлаг, спорт, сонгодог хөгжим, уран зураг, илтгэл мэтгэлцээний нийт 41 клуб идэвхтэй ажиллуулдаг. Сурагчид нь жил бүр “УДБЭТ”-ийн тайзнаа өөрсдийн уран бүтээлээ толилуулдаг байна. “ESM” сургууль олон улсын стандартыг хэрэгжүүлэхээс гадна Монголын боловсролын салбарын үндсэн чигийг баримтлахыг эрмэлздэг. Бүх хичээл нь англи хэлээр ордог ч суралцагчид ЭЕШ-даа хичээнгүйлэн бэлддэг тухай Хилл онцоллоо. “Хэдий олон улсын сургууль ч гэсэн бид Монголын өв соёл, уламжлалыг дээдлэн хүндэтгэж бахархдаг. Монгол сурагчдаас гадна өөр орны сурагчид суралцдаг учраас тэдэнд зориулж соёлын өдөрлөг зохион байгуулж, Монголын соёлыг танин мэдүүлэхийг зорьж байна” гэв.
Монгол хүүхдүүд хичээнгүйлэн зүтгэвэл тэдний хүрэх оргилын хязгаар нь “тэнгэр” байх болно”.
Цар тахлаас улбаалан урт хугацааны хөл хорио тогтоосон нь боловсролын салбарт хүнд цохилт өгч, нийт сурагч, багш, эцэг эхэд ихээхэн бэрхшээлтэй цаг үе тохиов. “Бид сайн багш нар, тогтсон хөтөлбөрүүдийнхээ дүнд хамтдаа даван туулж чадсан. Мөн манай сурагчид IB программын хүрээнд шинжлэн судлах суралцах арга барилыг сайтар эзэмшсэн учраас бие дааж суралцахад нь түлхэц боллоо” гэж тэрбээр хөтөлбөрийнхөө бас нэгэн онцлогийг тодотголоо. Тахлын үед тэдэнд сургалтын чанараа сайжруулах, тэлэх, шинэчлэл хийх талаар тунгаан бодох хугацаа олдож, сөрөг нөхцөл байдлаас эерэг үр дүнг гаргаж чадсан тухайгаа ч өгүүллээ. Covid-19-өөс улбаалан сурагчдад хичээлийн хоцрогдол үүсэж, төгсөх ангийн сурагчид гадаадын их, дээд сургуулиудад суралцах боломж хязгаарлагдмал болсон.
Иймээс “ESM” сургууль цаг үеийн нөхцөл байдалтай уялдуулан “Лаусон Хилл Олон Улсын Институт”-ийг үүсгэн байгуулж, үйл ажиллагаагаа эхлүүлээд байна. Ахлах сургуулиа төгсөж буй сурагчид жил өнжиж, академик болон хувь хүний чадвараа дээшлүүлэх нь их сургуульд элсэхийн өмнөх сайн бэлтгэл болдог гэж үзэх нь бий. Иймээс тус институт олон улсын суурь боловсролын диплом олгох хөтөлбөрийг хэрэгжүүлэхээр зорьж буй. Сурагчдаас гадна бизнесийн буюу байгууллагын захиалгат англи хэлний сургалтыг зохион байгуулж байна. “Цагдаа, Онцгой байдлын төрийн албан хаагчид англи хэлийг бүрэн эзэмшсэн бол карьерын хувьд илүү өсөх боломжтой байдаг” хэмээн Хилл өгүүлэв. Цаашид тус институт нь олон улсын мэргэжлийн байгууллагуудтай хамтран хувь хүний хөгжлийн болон туслах багшийн чадамжийн сургалтуудыг гаднын зочин, удирдагч багш нарын тусламжтайгаар суралцагчдад санал болгох аж.
