Forbes найм дахь удаагаа ОХУ-ын хамгийн чинээлэг гэр бүлийн жагсаалтыг олон нийтэд танилцууллаа. Тус жагсаалтыг Wildberries цахим худалдааны дэлгүүрийг үүсгэн байгуулагчид тэргүүлсэн бол удаах байранд Ротенбергийнхэн болоод «Фосагро» холдингийн хамтран эзэмшигч гэр бүл жагсжээ.
ОХУ-ын хамгийн том цахим дэлгүүрийг үүсгэн байгуулагч Татьяна Бокальчук болон Владислав Бокальчук нар анх удаа ОХУ-ын хамгийн чинээлэг 10 гэр бүлийн жагсаалтад орж, тэр бүү хэл тэргүүлэгчээр шалгарсан байна. Хосуудын нийт хөрөнгө 13,1 тэрбум ам. доллараар хэмжигдэж байна.
2019 оны сүүл хүртэл Татьяна Бокальчук нь компанийн цор ганц эзэмшигч байсан бол 2019 оны 12 дугаар сарын 31-ий өдөр өөрийн компанийн 1%-ийг нөхөртөө шилжүүлжээ. Учир нь ОХУ-ын хуулийн дагуу нэг хүний эзэмшил бүхий компани нь өөрийн 100% эзэмшил охин компани нээх, бүртгүүлэх боломжгүй байдаг аж. Дээрх шилжүүлэг нь ёс төдий зүйл бөгөөд цаашид Wildberries –ийн охин компанийг бүртгүүлэх, ирээдүйд бүтэц зохион байгуулалтыг тодорхойлоход шаардлагатай хэмээн Татьяна Бокальчук үзжээ.
Wildberries цахим дэлгүүр нь 2000-аад онд анхны хүүхэд нь мэдндэлсэн цагаас эхэлсэн аж. Өмнө нь хүүхдүүдэд гадаад хэл зааж байсан Татьяна нь хүүхэд төрүүлснийхээ дараагаар Otto & Quelle гэх брэндийн хувцас, гутлыг цахимаар борлуулан эхэлжээ. Тухайн үед түүний нөхөр Владислав нь анхны цахим хуудсыг нь нээн өгч байлаа. Харин 2006 оноос эхлэн тухайн цахим дэлгүүрээр дамжуулан барууны жижиг брэндүүдтэй шууд түншлэн хамтран ажиллах болсон гэдэг. 2008 онд Wildberries.ru нь бүсийн хүргэлтүүдээ 300 рубль-ээр тогтож байсан ч удалгүй хүргэлтээ үнэгүй болгон өөрчилжээ. Харин 2010 онд үйл ажиллагаандаа шинэчлэл хийн бүтээгдэхүүнийг өмсөх, бодитоор үзэх зэрэг боломжуудыг нэмэгдүүлсэн анхны цэгийг байгуулсан байна. Хэрэглэгчдэд энэхүү үйлчилгээ нь ихэд таалагдсан тул хоёр жилийн дотор улс даяар ижил төстэй 134 цэгийг бий болгожээ.
2012 онд Wildberries.ru нь зуун мянга гаруй төрлийн барааг цахимаар худалдаалдаг хамгийн их үйлчлүүлэгчтэй цахим дэлгүүр болсон бол 2016 онд 45,6 тэрбум рублийн эргэлттэй ОХУ-ын хамгийн том цахим дэлгүүрээр нэрлэгдсэн аж. Харин энэхүү компанийн үүсгэн байгуулагч Татьяна Бокальчук 2018 онд хамгийн баян оросуудын жагсаалтад багтжээ. Тухайн үед Forbes түүнийг 600 сая ам. долларын хөрөнгөтэй хэмээн мэдүүлж байсан бол ердөө жилийн дараа Wildberries компани нь ганц эвэрт хэмээх хочийг авч, харин Татьяна 1,2 тэрбум ам. долларын хөрөнгөтэйгөөр ОХУ-ын хамгийн баян эмэгтэйгээр шалгарсан байна.
