Өнөөдөр Уул уурхай, хүнд үйлдвэрлэлийн сайд Г.Ёндон, Ашигт малтмал, газрын тосны газрын Дэд дарга Ц.Эрдэнэбаяр нар шатахууны хомсдол, цаг үеийн асуудлаар мэдээлэл хийлээ.
Шатахууны хомсдол үүсэж буй гол шалтгааныг ОХУ, БНХАУ-аас 8-9 сард хийсэн шатахууны нийлүүлэлтийн хэмжээ буурсантай холбон тайлбарлаж байна.
Тодруулбал, ОХУ-тай хийсэн гэрээний дагуу Монгол Улс 28 мянган тонн шатахууныг авах байсан ч өнгөрсөн 8 сарын сүүлээр нөгөө талаас 17 мянган тонныг нийлүүлэх боломжтой талаар мэдэгджээ. Иймд шатахууны хомсдол үүсэх эрсдэлээс сэргийлж, шатахууны хэмжээг хэвийн байлгахын тулд БНХАУ-ын талтай гэрээ хийсэн байна. Одоогоор 1037 вагон бүхий /1 вагон 50 тонн орчим/ шатахууныг авах захиалгаа баталгаажуулчихсан байгаа бөгөөд зөвхөн ачигдахыг хүлээж байгаа аж.
Өнөөдрийн байдлаар улсын хэмжээнд шатахууны 16 хоногийн нөөц байгаа бөгөөд баруун бүсийн 5 аймаг, зүүн бүсийн 5 аймаг тус бүр шатахууны нийлүүлэлт хэвийн байна. Харин Улаанбаатар хотын хэмжээнд 4 хоногийн нөөцтэй байна.
Өнөөдөр яам, газрын тос импортлогч компанийн төлөөллүүд ОХУ-руу уулзалт хийхээр явсан бөгөөд эхний вагон ирэх хүртэл 4-7 хоногийн хугацаанд шатахууны хязгаарлалт тогтоох арга хэмжээг авч байна.
