Өнөөдөр /2021.09.13/ Монгол Улсын Ерөнхийлөгчийн санаачилгаар хэрэгжиж буй “Цар тахлын үеийн эдийн засгийн сэргэлтийг эрчимжүүлэх нь” сэдэвт төр, хувийн хэвшил, хөрөнгө оруулагч нарын зөвлөлдөх уулзалт болж өнгөрлөө.
Уулзалтад Монгол Улсын Ерөнхийлөгч У.Хүрэлсүх, Монгол Улсын Их Хурлын дарга Г.Занданшатар, Монгол Улсын Ерөнхий сайд Л.Оюун-Эрдэнэ болон холбогдох яам, агентлагийн дарга, бизнес эрхлэгчид, гадаад дотоодын хөрөнгө оруулагчид оролцлоо.
Уулзалтыг нээж, Монгол Улсын Ерөнхийлөгч У.Хүрэлсүх үг хэллээ. Тэрбээр “Цар тахал үргэлжилсэн амаргүй цаг үе энэхүү зөвлөлдөх уулзалт болж байна. Дэлхий дээр 255 орны 219 сая гаруй хүн ковид цар тахлын халдвар авч, 4,5 сая хүн нас бараад байна. Манай улсын хувьд, 232 мянга гаруй иргэд цар тахалд өртөж, өнөөдрийн байдлаар 963 хүн нас бараад байна. Аюул цар тахлын улмаас амь насаа алдсан ард иргэдийнхээ араас харамсан гашуудаж байна. Тэдний ар гэр, үр хүүхэд, төрөл төрөгсдөд нь гүн эмгэнэл илэрхийлж байна” гэв.
Төр засгаас энэхүү аймшигт цар тахлаас иргэдийнхээ амь нас, эрүүл мэндийг хамгаалах, урьдчилан сэргийлэх, эдийн засгийн уналтыг зогсоох, сэргээх чиглэлээр тодорхой ажлуудыг үе шаттайгаар авч хэрэгжүүлж ирсэнг дурдаад, цар тахалтай холбоотой хэд хэдэн тоо баримтыг танилцууллаа.
Статистик тоо баримт: Дэлхийн эрүүл мэндийн байгууллага, эрдэмтэн судлаачдын дүгнэлтээр манай улсад хийгдэж буй дархлаажуулалтын ажил харьцангуй хурдтай явагдаж байгаа бөгөөд дэлхийн дундажтай харьцуулахад, ойролцоогоор 6 сараас түрүүлж байна.
Өнөөдрийн байдлаар Монгол Улсын хүн амын 65 хувь нь 2 дугаар тунгийн вакцинжуулалтад бүрэн хамрагдаад байна. Энэ үзүүлэлтээрээ дэлхийн улс орнуудаас эхний 10-т жагсаж байна. Мөн иргэдийг 3 дугаар тунд хамруулах бүрэн хамруулах ажлыг өнгөрсөн 8 дугаар сарын 30-ны өдрөөс эхлүүлсэн ба одоогоор 199 мянган иргэд хамрагдаад байна.
Үүний дараа, Монгол Улсын Их Хурлын дарга Г.Занданшатар үг хэлэхдээ “Эрсдэл, сорилт нүүрлэсэн амаргүй цаг үеийг дэлхий нийт туулж байна. Дэлхийн улс орнууд, тэр дундаа Монгол Улс цар тахлын аюулаас сэрэмжлэн хамгаалах зорилгоор зайлшгүй авч хэрэгжүүлж буй арга хэмжээнүүд авч хэрэгжүүлсээр ирсэн билээ. Гэвч тээвэр логистикийн сүлжээ гацаах, экспорт, импортыг хумигдах, үйлдвэр, бизнесийг саатах эрсдэл арилсангүй, байсаар байна. Иймд энэ оны долдугаар сард УИХ дээр Ажлын хэсгүүдийг байгуулан, гадаад, дотоодын нөхцөл байлаа зөв оношилж, цаашид хэрэгжүүлэх алсын хараа, чиг замаа зөв гаргахаар ажиллаж байна” гэв.
Статистик тоо баримт: Манай улсын эдийн засаг өнгөрсөн онд 5,3 хувиар агшсан нь 90-ээд оны оноос хойш тохиолдсон 2 дахь тохиолдол юм.
50 их наяадаар эргэлдэж буй эдийн засгаа тэлэх шаардлагатай. Цар тахлын үеэр энэ тоо 38 их наяд төгрөг хүртэл болж буурсан. Үүний 10 их наяд нь улсын төсөв юм. Үүнийг хэмнэхийн тулд төр, хувийн хэвшлийн НЭГ ЗҮГТ харсан бодлого маш чухал гэдгийг онцолж байлаа.
Монгол Улсын Ерөнхий сайд Оюун-Эрдэнэ цар тахлын эдийн засгийг эрчимжүүлэх “Шинэ сэргэлтийн бодлого”-ыг танилцууллаа. Уг бодлого нь улс төрийн болон макро эдийн засгийн тогтвортой байдлыг хангах, төр, хувийн хэвшлийн хамтын ажиллагааг эрчимжүүлж, бизнесийн таатай орчинг бүрдүүлэх, гадаад, дотоодын хөрөнгө оруулалтыг сайжруулах, төсвийг шинэчлэх зорилготой юм.
Статистик тоо баримт: 2021 оны 09 дүгээр сарын байдлаар зэсийн үнэ 2 дахин, нүүрсний үнэ 2 дахин, төмрийн хүдрийн үнэ 50 хувиар, газрын тосны үнэ 10,5 хувиар, алтны үнэ 19 хувиар тус тус өссөн үзүүлэлттэй байна.
Урсгал дансны алдагдал нийт гадаад өр төлбөрийн хэмжээг нэмэгдүүлэх нөлөө үзүүлж байна. 2020 оны байдлаар 16,4 тэрбум ам.долларын зээл, 4,6 тэрбум ам.долларын багцын хөрөнгө оруулалт, 11,4 тэрбум ам.долларын компани хоорондын зээллэг, 12, 8 тэрбум ам. долларын хувьцаат хөрөнгө оруулалтын үлдэгдэл байна.
Нийгмийн халамжийн сангийн зардлын өсөлт 2021 онд нийт улсын төсвийн 30 хувь буюу 2997,7 тэрбум төгрөг болж өсөж, нийт хүн амын 80 хувийг эзэлж байна.
Монгол Улс эдийн засгаа эрчимтэй сэргээхээр “10 их наяадын хөтөлбөр” хэрэгжүүлсэн бөгөөд цаашид ийм төрлийн хөтөлбөрүүдийг үргэлжлүүлэн хэрэгжүүлэхээ мэдэгдлээ.
Мөн энэ үеэр Монголын томоохон бизнес эрхлэгчдийн төлөөлөл үг хэлсэнг онцолъё. Үүнд,
“Шунхлай” группийн Ерөнхийлөгч П.Батсайхан:
Цар тахлын дараа дэлхий хоёр хуваагдана. Нэг талаас цар тахлыг амжилттай даван туулсан улсууд, нөгөө талаас тахлын өмнө сөхөрсөн, эдийн засаг болон иргэдийн амьдрал доройтсон гэж хуваагдах болно.
Энэ сорилтыг даван туулах үүрэг, даалгавар бидний үеийхэнд ирлээ. Аливаа шинэчлэлийн 50 хувь нь удирдагчийн манлайлагчаас шууд шалтгаалдаг. Нийгэм, эдийн засгийн эгзэгтэй байгаа энэ үед тэсэж үлдэх нь Засгийн газар, УИХ-ын гишүүдийн алсын хараа, манлайллаас шууд хамаарна.
“Эм Си Эс”группийн Ерөнхийлөгч Ж.Оджаргал:
Бидний дунд бизнес эрхлээд 20,30 жил болж байгаа хүн олон бий. Ерөнхий сайд хэлэхдээ экспорт, хөрөнгө оруулалтыг дэмжихээ илэрхийлсэн. Нэг санал хэлэхэд, зүүнбаян чиглэлийн төмөр зам ашиглалтад орж байж, төмрийн хүдрийн экспорт нэмэгдэнэ. Мөн нүүрсний үнэ зах зээлийн оргил үе дээрээ байна. Гашуунсухайт, Шивээхүрэнгийн боомтын логистикийг нэн даруй шийдэж байж, экпорт нэмэгдэх боломжтой.
